BAGUIO CITY – Nakemmeg ti maysa nga indibidual gapu iti panaglabsingna iti COMELEC Gun Ban ken gapu iti panaggulo daytoy sadiay Riverside, Camp 4, Tuba, Benguet idi kalman.
Nabigbig daytoy a ni Vic Murillo, 48-anyos, tubo ti Bontic, Southern Leyte ken residente ti Camp 6, Tuba, Benguet.
Maibasar iti report, nagi-inom ti suspek ken dagiti kaarubana idi timmaud ti saanda a panagkikina-awatan.
Gapu iti daytoy, nagawid ti suspek ken nangala ti paltog sakbay nga intutukna iti kaarubana a ni Derek Gumatay, 21-anyos.
Dagus met nga inagaw ni Nelson Anca ti paltog nga iggem ti suispek ngem saan a nakontento ti suspek isut gapuna a nagawid manen ken nagala ti dua a hand grenade.
Nupay kasta, nabaelan manen dagiti kaaruba ti suspek nga agawen dagiti nasao a banag manipud iti daytoy.
Nakumpiskar dagiti nagresponde a pulis ti maysa a 38 caliber paltic revolver nga addaan ti uppat a bala ken awanan ti serial number ken ti dua a granada manipud iti suspek.