BAGUIO CITY – Sumangsango iti kaso a carnapping ti maysa a lalaki kalpasan ti panangtakawna iti maysa a lugan a nakaparada iti Jadewell Parking Area ditoy siudad ti Baguio.
Nabigbig daytoy a ni Antonio Pulacan, 40-anyos ken residente ti Liteng, Baguio City.
Maibasar iti imbestigasyon, imparada ti biktima a ni Madona Laorden ti luganna iti nasao a pagparadaan sakbay a nagturong iti public market tapno mangan.
Ginundawayan metten ti suspek a linukatan ti tawa ti lugan ti biktima babaen iti maysa a kutsilyo.
Nupay kasta, nakita daytoy ti maysa nga street sweeper a dagus a nagpaarayat kadagiti otoridad.
Tinengngelna ti suspek ken impaimana kadagiti nagresponde a pulis.
Naamuan pay a ginandat ti suspek nga alaen dagiti kagawaan iti uneg ti lugan ti biktima.
