BAGUIO CITY – Nakemmeg ti maysa a lalaki gapu iti panangpalpaltogna iti maysa a mannalon sadiay Ganao, Liguis, La Paz, Abra idi kanikadua.
Nabigbig ti suspek a ni Eduardo Morales Jr., 29-anyos bayat a nabigbig ti biktimana a ni Jeff Albert Berame Tesoro, 28-anyos, naasawaan, mannalon ken agpada dagitoy a residente iti nasao a lugar.
Maibasar iti report, nakatugaw ti biktima ken ti ikitna iti igid ti kalsada iti sangwanan ti pagtaenganda idi dimteng ti suspek a nakalugan iti motorsiklo.
Killaat a simmardeng ti suspek iti sangwanan dagiti dua ken iti awan umno a rason ket imbagana a tumaray ti biktima.
Kiniddaw ti suspek ti panagkalma ti suspek ngem inruar ti suspek ti maysa a caliber 45 pistol ken impaputokna daytoy iti tangatang.
Gapu iti daytoy, timmaray ti biktima ngem pinaltogan ti suspek daytoy.
Natamaan ti kanigid a luppo ti biktima bayat a naglibas ti suspek ngem nakemmeg babaen kadagiti nagresponde a kameng ti La Paz PNP nupay saan a narekober ti igam nga inaramat daytoy.
