BAGUIO CITY – Nakemmeg ti maysa a lalaki iti buy-bust operation dagiti otoridad sadiay Upper Tawang, La Trinidad, Benguet idi kalman.
Nabigbig daytoy a ni Marvin Wakit, adda iti legal nga edad ken residente iti nasao a barangay.
Nakumpiskar kenkuana ti 11 a sachet ti maatap a shabu, maysa a wallet, cellphone ken P2,000.
Sumangsango ita ti suspek iti kaso a panaglabsing ti RA 9165 wenno ti Comprehensive Dangerous Drugs Act of 2002.
Kabayatanna, boluntaryo a simmuko iti La Trinidad PNP ti 6 met a drug personalities ken dagitoy ket temporaryo laeng nga agananaed iti nasao a munisipyo partikular sadiay Barangay Balili ken Barangay Pico.
Sigun kenni PCI Benson Macli-ing, hepe ti La Trinidad PNP, amin dagiti nasao nga indibidual ket bin-ig a mammangged iti La Trinidad Vegetable Trading Post.
Innayonna pay nga uppat laengen a drug personalities ti sapsapulen ti La Trinidad PNP kas maibasar iti naawatda a drug watch list.
