BAGUIO CITY – Nakemmeg ti maysa a lalaki kalpasan a rinamesna ti ading ti live-in partner-na sadiay Hanger Market, Baguio City idi kalman.
Agtawen ti biktima iti dose bayat nga agtawen ti suspek ti 32.
Maibasar iti blotter ti pulisya, matmaturog ti balasitang idi immabay ken ginundawayan daytoy ti suspek.
Awan ti naaramidan ti biktima gapo iti butengna nangruna ta impangta ti suspek nga adda ti dakes a mapasamak kenkuana ken iti manangna no agipulong.
Nupay kasta, impulong ti balasitang ti napasamak iti manangna ken dagus met nga inyumanda iti pulisya a nagresulta iti panakakemmeg ti suspek.
Sumangsango ita ti suspek ti panaglabsing iti RA 8353 wenno ti Anti-Rape Law of 1997.
Mainaig iti daytoy, al-alukuyen manen ti Baguio Women’s and Children Protection Desk dagiti umili a saanda nga agbuteng a mangiyuman iti otoridad kadagiti makitkitada a panangabuso kadagiti babbae ken dagiti ubbing.
