Pimmusay ti maysa nga indibidual kalpasan a nabagbagsol idiay Barangay Magaspac, Gerona, Tarlac idi laeng kalman.
Nabigbig ti biktima a ni Wilfred Agmaliw Bejara.
Iti follow-up investigation ti Gerona Municipal Police Station, pimmusay ti biktima gapu kadagiti saksak a nasagrapna iti kanigid a barukongna.
Iti ekslusibo a pannakiuman ti Bombo Radyo kenni Lieutenant Colonel Ford Sudaypan, hepe ti Gerona Municipal Police Station, kinunana a nabayagen a gumatgatang ti chicken dung ti biktima iti lugar a maar-aramat kas abono iti Benguet.
Sigun iti opisial, posible a ti person of interest ket maysa kadagiti agkarkarga kadagiti abono iti truck ken posible nga am-ammo ti biktima. Iti agdama, ti nasao a person of interest ket “at large” wenno sapsapulen paylaeng dagiti otoridad.
Rimmuar pay iti imbestigasion a mapapati a naawanan ti kuarta ni Bejara nga ar-aramatenna kuma iti panaggatang iti chicken dung a mapatta-patta nga aggatad iti ₱60,000, a sigun metlaeng iti amo ti biktima.
Kabayatanna, nagpalagip ti opisial iti publiko, nangruna kadagiti agbibiahe iti addayo a lugar, nga agannad iti kuartada, liklikan ti panangipakita iti sabsabali, ken saan nga agtalek kadagiti ganggannaet.
Iti agdama, ti bangkay ket adda sadiay Tawang, La Trinidad, Benguet.
