Napilaanen ti kaso ti maysa a lalaki nga Iranian kalpasan nga imbilin ti Iranian elite Revolutionary Guards Corps a mapapatay ni Estados Unidos President-elect Donald Trump.
Sigun iti Justice Department, impakaamo ni Farhad Shakeri kadagiti pannakabagi ti linteg a nabilin daytoy idi Oktubre 7, 2024 a mapapatay ni Trump.
Ngem inlawlawag ni Shakeri kadagiti pannakabagi ti linteg nga awan ti planona a mangbukel iti plano a mangpapatay kenni Trump iti uneg ti timeline ti Islamic Revolutionary Guard Corps (IRGC).
Inladawan ti Justice Department ni Shakeri nga agtawen ti lima pulo ket maysa, Islamic Revolutionary Guard Corps (IRGC) asset ken agnanaed idiay Tehran.
Mapapati nga immakar idiay Estados Unidos idi ubing paylaeng daytoy ken naideport idi 2008 kalpasan ti pannakakonbiktarna iti panagtakaw.
Sigun kadagiti piskal, nawaya ita ni Shakeri ken mapapati nga adda idiay Iran.
Maibasar met iti statement manipod kadagiti dua a nakadua ni Shakeri iti pagbaludan a da Carlisle Rivera ken Jonathan Loadholt, a naidarum gapu iti panangtulongda ken Shakeri a nagplano a mangpapatay iti maysa nga umili ti Estados Unidos a nagtaud iti Iran idiay New York, a nailadawan kas kritiko ti gobierno ti Iran a sigud a puntiria gapu iti pammapatay.
