BAGUIO CITY – Pimmusay ti maysa a lalaki kalpasan a pinaltogan ti saan pay a nabigbig a suspek iti sangoanan ti maysa nga store sadiay Buyagan, Poblacion, La Trinidad, Benguet itay agarup alas singko ti parbangon.
Nabigbig ti biktima a ni Daniel Lacpap, agtawen iti limapulo ket tallo.
Iti panakaiuman ti Bombo Radyo iti menor de edad a testigo iti nasao a krimen, nagturong daytoy ken ti dua pay a kadwana a menor de edad iti nasao nga store tapnu agkape idi nakitada ti maysa a lalaki a nangsurot iti biktima.
Apaman a talyawen ti biktima ti suspek ket naipasabat ti paltog iti mugingna a dagus nga imputok ti suspek sakbay a naglibas.
Nagtitinnulong met dagiti tallo a menor de edad a nangbagkat iti biktima ken intarayda iti ospital nupay daksanggasat ta pimmusay daytoy.
Kinuna ti testigo a ti suspek ket nakabonete iti nangisit, nakasuot iti nangisit a face mask, nakasuot iti nagkupas a maong jacket ken maong pants, ken mapattapatta nga agtayag iti 5’4.”
Kabayatanna, iti met panakiuman ti Bombo Radyo News Team iti store owner ket kinunana nga ibuybuyatnan ti napudot a danum a pagkape dagiti menor de edad idi nakangeg daytoy iti kanalbuong ti paltog.
Idi tumalyaw daytoy ket nakitana laengen ti biktima a nakasanggir ken agsaysayasay ti dara iti ulo daytoy.
Iti met panagresponde dagiti pulis ket nakarekoberda iti maysa a buli ti bala ti maatap a caliber 45 a paltog.
Iti agdama ket agtultuloy ti imbestigasyon dagiti pulis iti nasao a krimen.
