BAGUIO CITY – Pimmusay ti maysa a lalaki kalpasan a naidungpar ti imanmanehona a motorsiklo ti maysa a wrangler iti deppaar ti Mankayan-Cervantes National Road sadiay Sitio Pas-adan, Colalo, Mankayan, Benguet idi kanikadua.
Nabigbig ti pimmusay a ni Arjay Liniasan Abkilang, 25 anyos bayat a ti agtagikua iti wrangler ket ni Jonathan Manuel Catawe, 38 anyos ken agpada dagitoy a residente ti Cervantes, Ilocos Sur.
Maibasar iti inisyal a report ti Mankayan PNP, pasalog ti motorsiklo paturong sadiay Cervantes ken maatap nga inokuparanna ti opposite lane a nangitunda iti panagdinnungparda iti agbibiahe a wrangler.
Gapu iti daytoy, nagsagrap ti driver ti motorsiklo iti dunor ken sugat iti nagduduma a paset ti bagina bayat a saan a naan-ano ti driver ken dagiti pasahero ti wrangler.
Naitaray ni Abkilang iti Lepanto Hospital para iti panakatamingna ngem pimmusay kalpasan ti sumagmamano laeng nga oras.
Iti agdama ket agtultuloy paylaeng ti imbestigasyon ti Mankayan PNP iti nasao nga insidente.
