BAGUIO CITY – Malamlamayan ita ti maysa a lalaki a pimmusay kalpasan a natinnag ti imanmanehona a mini dump truck nga addaan iti plaka nga RZL-277 sadiay Pekew, Poblacion, Buguias, Benguet idi kalman.
Nabigbig ti pimmusay a ni Erwin Carlos Makin, 26, ken residente ti Natubleng, Buguias, Benguet.
Maibasar iti inisyal nga imbestigasyon ti Buguias Municipal Police Station, nakaawatda iti tawag manipud iti maseknan nga umili a mangipakpakaammo iti natinnag a lugan iti rangkis iti nasao a lugar.
Nagresponde dagiti kameng ti Buguias PNP ken BFP-Buguias ken nakitada ti naan-anay a nadadael a lugan a natinnag iti nasurok kumurang 350 metro a kangato a rangkis manipud iti kalsada.
Saanda a nakita iti bisinidad ti driver isut gapuna a nagsawar dagitoy agingga a nakitada ti bangkay ti driver iti ayan ti karayan.
Kinuna met dagiti testigo a paturong ti lugan sadiay Abatan, Buguias idi natinnag iti rangkis.
Imimbestigaran ita dagiti otoridad nu anya ti rason ti nasao nga aksidente.
