BAGUIO CITY – Malamlamayan ita ti maysa a lalaki kalpasan a pimmusay daytoy iti napasamak a vehicular self-accident iti deppaar ti national highway ti Poblacion West, Lamut, Ifugao itay laeng nabiit.
Nabigbig daytoy a ni Francis Cabbigat Maggun, 26-anyos, residente ti Lamut, Ifugao ken backrider ti motorsiklo nga addaan side car a nairaman iti aksidente.
Nagsagrap met iti dunor iti ulo ni Leomar Anthony Puguon Ollier, 26-anyos, residente ti Lamut, Ifugao ken driver ti nasao a motorsiklo.
Maibasar iti report, paturong ti lugan iti direksion ti Lagawe, Ifugao ken bayat ti panagdalyasat daytoy iti national road ket nagpa-igid ti driver.
Nupay kasta, naidungpar ti lugan iti gutter ti kalsada sakbay a simmang-at iti nangato a paset ti kalsada agingga a bimmaliktad daytoy.
Nangitunda daytoy iti panakatnag dagiti dua a biktima iti kalsada.
Naitaray dagiti biktima iti Panopdopan District Hospital ngem naideklara a ‘dead on arrival’ ni Maggun.
Naduktalan met iti imbestigasyon ti pulisya a nakainom iti arak ti dua a biktima.
