BAGUIO CITY – Kumarkaro ti lammin a mapaspasaran iti siudad ti Baguio ken probinsya ti Benguet. Itay parbangon ket nailista ti kababaan a temperatura iti siudad ti Baguio a dumanon iti 11.0 degrees celsius ken manamnama a nababbaba pay kadagiti nangangato a paset ti Benguet.
Segun iti Pagasa-Baguio, posible a bumaba pay ti temperatura iti siudad kadagiti sumarsaruno nga al-aldaw agingga iti bulan ti Pebrero.
Kabayatanna, nailista met ti andap wenno frost iti sumagmamano a paset ti Benguet, partikular sadiay Madaymen, Kibungan wenno ti maaw-awagan a Little Alaska, iti Paoay, Atok, agramanen iti Mt. Purgatory ken Mt. Pulag.
Immunan a nagpalagip met ti Department of Health Cordillera iti publiko nga agsuotda iti napupuskol a bado iti agsapa ken iti sardam gaputa ditoy a kadawyan a bumababbaba ti temperatura.
