BAGUIO CITY – Kumarkaro ti lammin a mapaspasaran iti siudad ti Baguio ken probinsya ti Benguet.
Daytoy ket kalpasan a bimmagsak ti temperatura iti City of Pines itay alas-sais ti agsapa a dumanon iti 7.3 degrees celsius, nababbaba iti 8.0 degrees celsius a nailista ditoy siudad idi kalman.
Segun iti Pag-asa Baguio, ti panagkaro ti lammin ditoy siudad ket gapu iti pimmigsa a nepnep nga agtataud iti Siberia.
Gapu iti daytoy ket nagpalagip ni Dr. Rowena Galpo ti Baguio City Health Department iti publiko a pagtalinaedenda a normal ti temperatura ti bagida tapnu maliklikan dagiti respiratory diseases kas iti pneumonia, trangkaso, respiratory infections ken asthmatic attack.
Inlawlawag ni Galpo a tunggal nalam-ek ti klima ket dakkel ti posibilidad nga umatake ti asthma ken pneumonia.
Imbalakadna ti panagisuot iti napupuskol a jackets, medyas ,ken dadduma pay a proteksyon iti lammin.
Innayun ti doktora a napintas met laeng ti panagehersisyo iti agsapa tapnu bumara ti bagi.
