BAGUIO CITY–Inaklon ti Unified Cordillera People’s Liberation Army (Unified CPLA) nga adda dagiti impostor wenno dagiti grupo nga agpampammarang a CPLA iti probinsia ti Benguet ken dagitoy ket karaman iti land grabbing wenno panag-agaw ti daga ken extortion wenno panagkikil.
Nailanad daytoy iti resolusyon nga insumitir ti Unified CPLA iti Provincial Board ti Benguet ken iti amin a maseknan nga ahensia ti gobyerno.
Sigun iti grupo nga idadauluan ni Abra Vice Governor Ronald Balao-as, konkondinarenda ti biddut a panagaramat dagiti nasao nga impostor iti nagan dagitoy.
Impeksada pay ti karida a panagbalinda a kangrunaan a mangisakad iti panagbalin nga autonomous region ti Cordillera.
Innayonda a saanda a bigbigbigen dagiti nasao a grupo.
Immunan a nangipasa ti probinsia ti Benguet iti resolusyon a saan a mangbigbigbig kadagiti aniaman a grupo nga agpapabigbig a miembro ti CPLA ken mangkonkondinar iti maibagbaga a panag-recruit dagitoy a nakariribok iti kappia kadagiti umili.
