BAGUIO CITY – Mangipatpatungpal iti naun-uneg nga imbestigasyon ti pulisya mainaig iti panakapapatay ti maysa a land surveyor a nasarakan laengen ti bangkayna sadiay San Carlos Heights, Irisan, Baguio City idi rabii.
Nabigbig ti biktima a ni Harold Gideon Madarang Chumacog, 47, ken residente ti Victoria Village, Baguio City.
Segun iti Baguio City Police Office Station 9, dimmalan sadiay ti dua a concerned citizens a nakalugan iti van idi nakitada ti biktima a nakadasay iti igid ti kalsada.
Inasitganda daytoy ket nakitada ti dara-dara a biktima.
Pinagtinnulonganda nga inlugan ken intarayda daytoy iti ospital ngem daksanggasat ta naideklara a dead on arrival.
Naamuan a nagsagrap ti biktima iti bagsol iti barukong ken kanigid nga ima daytoy.
Iti agdama ket dukduktalen ti pulisya ti motibo ti nasao a krimen nangruna ta saan a nagargaraw ti relo, cellphone ken wallet ti biktima.
Maipaspasidong met laeng iti panagadal dagiti CCTV footages a naala iti asideg ti nakapasamakan ti insidente para iti posible a panakabigbig dagiti suspek.
