Inlawlawag ti kampo ni Vice President Sara Duterte saanna a kayat a sawen a ti kaawan ti cash on hand ken bank deposit ti bise presidente iti Statement of Assets, Liabilities, ken Net Worth (SALN) manipud 2019 agingga 2024 ket saannan nga indeklara daytoy.
Sigun kenni Atty. Michael Poa, pannakangiwat ti depensa ti bise presidente a dagiti natural assets daytoy ket nairaman iti katergorya nga ‘others’ iti paset ti personal properties na iti Statement of Assets, Liabilities, ken Net Worth.
Inlawlawag ni Atty. Poa nga imbes nga maysa -maysa nga ilista, napagmaymaysa amin a cash, alahas, ken dadduma pay a personal a kagawaan daytoy iti maysa a line item.
Rimuar ti nasao nga isyu kalpasan iti panagdengngeg ti House Justice Committee seknan iti naipila nga impeachment complaints kontra iti bise presidente no sadino nakita dagiti mammanday-linteg nga awan ti nakasina a deklarasyon ti cash on hand wenno bank deposits iti SALN daytoy manipud 2019 uray no dakkel ti net worth daytoy manipud iti nasurok-kumurang P55 million idi 2019 agingga P88 million idi 2024.
Kinumpirmar met ti SALN custodian ti Office of the Ombudsman a maibasar iti naisumitir a dokumento, awan ti naisina a cash wenno deposits kadagiti nadakamat a tawen.
Nupay kasta, impetteng ti kampo ni Vice President Duterte a sumaruno nga ilawlawagda nu apay a nagbaliw ti panangipresenta iti SALN ti bise presidente.
Sigun iti abogado daytoy, mapalpalubosan gamin ti panangimaymaysa iti agpada a klase ti personal properties iti SALN ken impettengna a saan nga indikasyon daytoy nga adda ti ‘unexplained wealth’ ti bise presidente.
Immunan nga impaganetget ti bise presidente a nalinis ti service record daytoy ken legal ken addaan papeles amin nga assets daytoy. //bombokaren.c.s
