BAGUIO CITY – Inrekomendar ti Office of the Mayor ti Dolores, Abra ti legal nga aksion kontra kenni Councilor Russ Marion Zapata gapu iti panaglabsing daytoy iti curfew ordinance ti munisipyo.
Nailanad daytoy iti official statement ni Dolores Mayor Conde Turqueza seknan iti maatap a panangdangdangran ti konsehal ken ti dua a kadwa daytoy iti maysa a pulis a nangipalagip kadagitoy iti curfew hours ti munisipyo idi rabii ti Enero 1.
Sigun iti mayor, makapaliday ti napasamak nga insidente iti umuna nga aldaw ti tawen ken nairaman pay ditoy ti maysa a konsehal a rumbeng kuma a mangraem kadagiti naputar a linteg ken ordinansa para iti panakasalwad dagiti umili.
Napaneknekan iti imbestigasyon ti opisina ti mayor a naglabsing ni Councilor Zapata iti curfew ordinance ti Dolores.
Kinunana a maiparbeng laeng a kundinaren dagiti amin a natulnog nga umili sadiay ti inaramid ti konsehal a pinagtalkan dagiti tattao a mangidaulo kadakuada.
Kabayatanna, kinuna ni Mayor Turqueza nga agtalek ti lokal a gobyerno ti Dolores iti patas a panangimbestigar ti pulisya iti isyu iti panangdangdangranda Councilor Zapata iti maysa a pulis ti Dolores ken suportaranda ti imbestigasyon tapnu maduktalan ti kinapudno ken sangwen dagiti nagaramid iti krimen ti pannusa nga ipataw ti linteg.
Impasiguradona pay a ti napasamak ket isolated incident ken agtaltalinaed a nakappia ken natalna ti ili ti Dolores, Abra.
