Mangipila ti legal team ni sigud a president Rodrigo Duterte ti apela kontra iti desisyon ti International Criminal Court (ICC) Pre-Trial Chamber kalpasan a kinumpirmar daytoy dagiti kaso kontra iti sigud a presidente gapu iti ‘war on drugs’ campaign daytoy kabayatan iti panagtugawna kas mayor idiay Davao ken presidente ti pagilian a Pilipinas.
Sigun kenni Atty. Nicholas Kaufman, kiddawenna ti panangipalubos a mangipila dagitoy iti apela iti nagbalin a desisyon ti korte nga inawaganna a “most bizarre” ken narigat a matarusan.
Impettengna a kasla ay-ayunan ti pre-trial chamber ti prosekusyon ken saan daytoy a ikonkonsidera ti karbengan ti sigud a presidente.
Kinuwestyon pay ti nasao nga abogado ti kinakurang ti detalye kadagiti akusasyon ken saan a panangdakamat kadagiti ebidensya wenno nagbalin a basaran ti desisyon ti korte.
Kabayatanna, dinakamat ni sigud a Chief Presidential Legal Counsel Atty. Salvador Panelo a “pre-judged” ti nasao a kaso ket inakusaranna nga adda ti maatap a ‘sabwatan’ iti nagbaetan ti International Criminal Court ken ti agdama nga administrasyon.
Pinaglibakan met daytoy ti Malacanang.
Sigun kenni Palace Press Officer Undersecretary Atty. Claire Castro, idi pay laeng 2017 a naipila ti kaso, a saan pay laeng a ni President Ferdinand Marcos, Jr. ti nakatugaw kas presidente.
Impetteng pay ti Malacanang a nu awan ti napasamak nga panangpapatay kadagiti biktima, saan kuma a dimmanon iti International Criminal Court ti nasao a kaso. //bombokaren.c.s
