Mapalpalagipan dagiti sumango iti Licensure Examination for Teachers (LET) inton March 23, 2025 nga agturong dagitoy kadagiti naituding a testing centersda sakbay iti 5:30 iti agsapa tapno maliklikanda ti panakatraffic.
Iti panakiuman iti Bombo Radyo kenni Juanita Domogen, director iti Professional Regulation Commission-Cordillera, imbinglayna a dumanon iti 5, 138 dagiti examinees para iti March 2025 Licensure Examination for Teachers iti Baguio City.
Buklen dagitoy dagiti graduates manipod nagduduma a lugar ken kabangibang a rehion.
Sigun kenni Domogen, uppat ti venues para iti eksaminasyon iti elementary level a pakairamanan iti Aguinaldo Elementary School, Baguio Central School, Easter College, ken ti Mabini Elementary School.
Karaman met kadagiti venues para iti secondary level ti Baguio Central University-Bonifacio Campus, Baguio City High School, Lucban Elementary School, Pines City Colleges, Pines City National High School, ken ti Univesity of the Cordilleras.
Mangrugi ti eksaminasyon para iti elementary level iti 8:00 AM ken agleppas iti 2:00 PM bayat nga 8:00 AM agingga 6:30 PM met ti eksaminasyon para iti secondary level.
Kabayatanna, manamnama a mairuar ti resulta iti 2025 March Licensure Examination for Teachers inton bulan iti Mayo.//Bombo Rob Dominguez
