BAGUIO CITY – Naiparikep ti pagminasan iti Level 300 ken Level 400 sadiay Loacan, Antamok, Itogon, Benguet idi laeng nabiit.
Iti panakiyuman ti Bombo Radyo kenni Itogon Mayor Victorio Palangdan, kinunana nga impaulogna ti Administrative Order No. 3 series of 2018 a mangibilbilin iti panakaimplementar ti Stoppage Order No. 01 Series of 2016 iti nasao a lugar.
Kinunana nga imbilin ni Benguet Governor Cresencio Pacalso ti panangipaulogna iti nasao a pammilin kalpasan a nakaawat daytoy iti reklamo manipud kadagiti asosasyon dagiti small scale miners nga addaan operasyon kadagiti nasao a pagminasan.
Imbingayna nga idi panawen ni sigud nga Environmental Secretary Lito Atienza ket nangipaulog daytoy iti order of moratorium a mangipawpawil iti aniaman a kita ti panagminas iti entero a barangay ti Loacan.
Nupay kasta, gaputa awan ti dadduma a pagbiagan dagiti tattao sadiay ket naipalubos ti panagminasda ken saan nga inyim-implementar ti national government ti nasao a pammilin.
Dinakamatna nga addan ti immuna a closure order nga impaulogna para iti nasao a lugar kalpasan nga adda ti timmaud a saan a panagkikinaawatan dagiti small scale miners sadiay ngem saan a naipatungpal kalpasan a naisimpa ti isyu dagitoy.
Nupay kasta, impetteng ti mayor nga ita a kimmaro ti apa dagiti maseknan a grupo ken adda payen ti nagpila iti reklamo iti gobernador ket imbilinnan ti panakairikep ti Level 300 ken Leve 400.
Naamuan a tallo nga asosasyon dagiti small scale miners ti nakaidirektaan ti stoppage order ken dagitoy ket ti Loakan-Itogon Pocket Miners Association, Antamok-Loakan Miners Association ken ti maysa a baro a grupo.
Posible met a maipilaan iti kaso dagiti maseknan a minero iti kanito nga ipettengda a sumrek kadagiti nasao nga usok.
Kinuna ni Mayor Palangdan a daytoy ket gaputa naiparikepen dagiti nasao a pagminasan babaen iti stoppage order ken no agpilit daigti maseknan a minero a sumrek iti naiparikep nga usok ket maipilaan dagitoy iti criminal cases.
Innayonna a no maisimpan to ti susik wenno saan a panagkikinaawatan dagiti maskenan nga asosasyon dagiti minero sadiay ket mabalin nga agaplikar manen dagitoy para iti panakailukat dagiti nasao nga usok manipud kadagiti maskenan nga ahensia ti gobyerno.
Dinakamatna pay nga adda met dagiti dadduma a pagbiagan wenno livelihood nga ididiaya ti municipal government a mabalin a pagnumaran dagiti nasao a minero kas iti organic farming.
Naamuan a napeggad met laeng ti nasao a lugar para iti panagminas.
