BAGUIO CITY|Inlawlawag ni Baguio City Councilor Benny Bomogao a saan laeng a ti Land Transportation Office (LTO) ti mabalin nga agkumpiskar iti plaka ti lugan ken mangimaton iti taray ti trapiko.
Iti Interview ti Bombo Radyo, kinuna ni Councilor Bomogao nga iti sidong ti Republic Act 7160, adda ti bileg ti Local Government Unit (LGU) nga agaramid ken mangipasa iti linteg seknan iti regulasyon ti trapiko.
Innayonna nga adda ti nagdumaan ti LGU ken LTO no kasanoda a mangipatungpal iti pagalagadan iti trapiko ngem rumbeng nga agtinnulong dagitoy.
Nupay kasta, impaganetgetna a dagiti laeng mabalin nga agkumpiskar iti plaka ket dagiti na-deputize manipud iti LTO.
Kinunana a daytoy met ti rason a mangisaysayangkat iti training ti Traffic Management Division para kadagiti traffic enforcers ken kast met ti panakaipasidongda iti proseso iti deputization.
