BAGUIO CITY – Pimmusay ti maysa a soldado kalpasan nga aksidente a napaltogan ti kasinsinna bayat nga addada iti uneg ti pagdagdagusanda iti ATF Building sadiay Camp Allen, Baguio City idi rabii kalman.
Nabigbig ti biktima a ni Staff Sergeant Romenick Dawaton, 42-anyos, naasawaan, Liaison Officer ti AFP – Northern Luzon Command ken tubo ti Pasil, Kalinga bayat a nabigbig ti kasinsinna a suspek a ni Balmaceda Dawaton, 20-anyos, baro ken estudyante.
Naduktalan iti imbestigasyon ti pulisya a sakbay ti insidente ket naginom iti arak ti agkasinsin ken ti maysa pay a kabagianda ken ditoy nga imbingay ti biktima ti parikutna ken imbilinna ti panakaidulin ti paltogna a Caliber 45.
Nailanad iti salaysay ni Balmaceda Dawaton a bayat a nakaturong ti kasinsinna iti sofa ket nagturong met daytoy iti silid ti kasinsinna ken inalana ti paltog ti kasinsinna a naikabil iti sirok ti pungan.
Inikkat ti baro ti magazine ti paltog tapnu idulinna kuma ngem idi inkalbitna ti gatilyo ti paltog ket pimtuk daytoy.
Limsut ti bala ti paltog iti kanigid a dakulap ni Balmaceda Dawaton sakbay a timmama iti tile floor ngem nagballatek ken naitama iti barukong ti matmaturog a kasinsinna.
Naitaray pay ti soldado iti pagagasan ngem pimmusay kabayatan ti panakatamingna.
Naiturong metten ti ub-ubing a Dawaton iti kustodiya ti pulisya para iti panakaimbestigar ti kaso ken narekober ti paltog ti biktima.