Matungpal itan ti nabayagen a maur-uray a binnulan a food voucher dagiti indigent college students kalpasan nga inaprobaran ti City Council ti Free Youth Meals for College Students Ordinance of 2023.
Panggep ti libre a youth meals program a pagbalinen nga ad-adda a nalaka ti edukasion babaen ti panangkessay iti food insecurity ken panangsuporta iti retention rate dagiti estudiante iti kolehio, nangruna dagiti nababa ti matgedanna a pamilia, kagiddan ti panangitandudo ti salun-at ken nutrision.
Iti sidong ti Implementing Rules and Regulations (IRR) nga indauloan ti City Social Welfare and Development Office (CSWDO), ti free meals program ti siudad ket mangipaay ti P2,500 iti food vouchers iti tunggal bulan tapno makwalipikar dagiti low-income college students iti maysa nga institusion iti siudad.
Maiyaplikar ti nasao a programa kadagiti college wenno university students iti siudad, pakairamanan dagiti student assistants, nu maragpatda ti qualification a kas iti nababa ti matgedanna a pamilia, makapasa iti screening nga inaramid ti CSWDO, mangmintinir iti passing grades, ken saan nga umawat iti sabali a tulong ti gobierno.
Ti panangiwaras ket babaen ti “secure system” iti panakitinnulong kadagiti makipaset nga eskuelaan tapno mapaneknekan ti pannakakualipikar ken malapdan ti saan a nasayaat a pannakaaramat daytoy.
