BAGUIO CITY – Aw-awisen ti dadaulo ti DENR-Cordillera dagiti plantito ken plantita wenno dagiti naissem nga agmula iti masetas iti panagturongda iti opisinada tapnu maipaayanda kadagiti sabong.
Iti interview ti Bombo Radyo Baguio kenni DENR- Cordillera Regional Director Engr. Ralph Pablo, babaen iti daytoy ket saandan nga agparot pay kadagiti endangered plants a masarakan iti kabakiran.
Sigun kenkuana, iligal ti panagala kadagiti maibilbilang nga endangered plants nga adda kadagiti kabakiran.
Inlawlawagna nga adda ti linteg a mangdusa kadagiti agal-ala kadagiti mula kadagiti kabakiran.
Dinakamatna a panaglabsing daytoy iti RA 9147 wenno ti Wildlife Resources Conservation and Protection Act.
Innayonna nga adda dagiti wildlife enforcement officers iti intero a rehiyon Cordillera nga agwanwanawan kadagiti kabakiran tapno maliklikan ti panagala dagiti umili kadagiti endangered plants.
Maipalagip nga itay laeng nabiit ket naipadamag ti panagala dagiti sumagmamano nga indibidual kadagiti masetas iti nagduduma a lugar ditoy Baguio City, nangruna kadagiti parke.
