Nailaylayon agingga inton Mayo baente iti agdama a tawen ti libre a panagpasyar iti Baguio Botanical Garden kadagiti residente iti Baguio City, La Trinidad, Itogon, Sablan, Tuba, ken Tublay wenno kadagiti BLISTT residents.
Daytoy ket manipud iti naituding a panagleppasna idi Abril 21, 2025.
Maipalagip a naaprubaran ti baro nga ordinansa a mangipalubos iti libre nga access no umuneg iti Baguio Botanical Garden kadagiti residente ti BLISTT kas panagyaman ti siudad iti suporta dagitoy iti naangay a Panagbenga Festival idi Pebrero.
Daytoy ket in-authored ni Councilor Jose Molintas ken naaprubaran ken pinirmaan ni Mayor Benjamin Magalong idi bulan ti Marso.
Malaksid iti panagyaman iti siudad kadagiti kabangibang a lugar ket para iti panakaitandudo iti environmental awareness, recreational ken educational opportunities kadagiti residente.
Iti panagserrek iti Botanical Garden ket kasapulan a mangipakita dagiti sumrek iti valid identification document kas proweba a residente dagitoy iti BLISTT.
