BAGUIO CITY – Isagsaganan ti lokal a gobierno ti Baguio City ti panagaramat iti libre nga online health care para kadagiti indibidual a maipaspasidong iti Home Quarantine kagiddan ti panagngato ti kaso iti COVID-19.
Sigun iti mayor ti siudad, sumagmamano a panagsanay ti naisayangkat idi napan a tawen para kadagiti madutjkan a mangimando iti ‘Bantay Covid’ a maysa a telemedicine digital platform.
Kinunana nga ipalpalubos ti nasao a digital platform ti interaksion iti nagbaetan dagiti naka-quarantine ken dagiti doktor tapnu masukimat ken mamonitor ti kasasaad dagitoy.
Kagiddan metlaeng daytoy ti panagkurang ti siudad iti kaskenan nga isolation ken quarantine facilities kabayatan ti agtultuloy a panagngato ti kaso ti siudad isu’y gapuna nga ididiayada ti home quarantine kadagiti asymptomatic ken addaan iti mild wenno moderate cases ti COVID-19.
Ti naso nga online platform ket naibasar iti manarimaan nga online progam ti Quezon City no sadino agserserbi dagiti volunteer doctors kadagiti naka-quarantine nga indibidual babaen iti digital technology.
Inlawlawag met ti mayor a nabukel ti libre a digital program kas maibasar iti pagkasapulan dagiti residente ditoy siudad ken idauluan daytoy ti City Health Services Office kadwada ti City Mayor’s Office Management Information and Technology Division ken ti Baguio-Benguet Medical Society.
Adu a doktor ti nangipanamnama iti panagboluntaryo dagitoy iti programa ken ti gagarda a makipaset iti panangipaay ti serbisyo iti komunidad babaen ti panagbibinadang .
