Magkakaroon ng libreng math tutorials para sa mga mag-aaral ng Grades 5 hanggang 10 sa Baguio City Public Library sa Sabado, Hulyo 11, 2026, ayon sa social media post ng nasabing opisina.
Layunin ng programa na matulungan ang mga estudyante na mas mapaunlad ang kanilang kaalaman sa matematika sa pamamagitan ng mga araling pang-akademiko na pangungunahan nina Adonis Togan, Danica Zandra Q. Almazan, at Julia Arphem C. Abahan.
Nakatalaga ang mga tutor sa bawat baitang, kung saan isasagawa ang mga sesyon sa sumusunod na oras: 8:00 ng umaga para sa Grades 5 at 6, 9:00 ng umaga para sa Grades 7 at 8, at 10:00 ng umaga para sa Grades 9 at 10.
Ayon sa mga organizer, walang kinakailangang pagpaparehistro para makilahok. Hinihikayat lamang ang mga mag-aaral na pumunta sa aklatan sa itinakdang oras para sa kanilang antas.
Inaasahang makatutulong ang programa upang gawing mas kawili-wili at mas madaling maunawaan ang pag-aaral ng matematika para sa mga kabataan.
