BAGUIO CITY – Posible nga adda manen ti idiaya ti Land Transportation Franchising and Regulatory Board (LTFRB) – Cordillera a libre a transportasyon para kadagiti health workers ken Authorized Persons Outside Residence (APORs) iti sidong ti Service Contracting Program ti ahensia.
Sigun kenni LTFRB-Cordillera Regional Director Engr. Lalaine Sobremonte, manamnama a maipaluspos ti pondo a P3-B ita a bulan para iti implementasyon manen ti nasao a programa.
Inlawlawagna a ti pondo ket nailanad a probisyon ti General Appropriations Act of 2021 wenno ti national budget isut gapuna a bassit laeng daytoy.
Kinunana nga iti kanito a marugian manen ti nasao a programa ket makiumanda manen kadagiti transport cooperatives nga immunan a nag-consolidate ken nakipaset iti programa no kayatda manen a makipaset iti daytoy.
Maipalagip a dumanon iti nasurok 3,000 a drivers ken operators iti rehion Cordillera ti nagnumar iti nasao a programa.
