BAGUIO CITY – Natiliw ti lider ti maysa a criminal gang ken dua a kakadwana iti buy-bust operation nga insayangkat dagiti otoridad iti deppaar ti Purok 4, Lopez Jaena, Aurora Hill, Baguio City idi rabii ti Dominggo, July 25, 2021.
Nabigbig dagitoy a da Erwin Dela Peña Roc, 30; Briggs Austria Balacdao, 29; ken Paolo Julian Cariño Estacio, 29.
Agpada a High Value Individual da Roc ken Balacdao bayat nga Street Level Individual ni Estacio.
Naamuan a nabayagen a nawanawanan dagiti otoridad ti operasyon ni Roc iti iligal a droga ken panagtakaw bayat a nabigbig ni Balacdao kas lider ti Balacdao Theft Group, maysa a criminal gang nga addaan operasyon iti siudad ti Baguio.
Inlako dagiti tallo ti dua a pakete ti mapapati a shabu nga agdagsen ti agarup nasurok 10 a gramo iti nakatransaksionda nga operatiba.
Nakumpiskar pay kenni Balacdao ti pakete ti mapapati a shabu nga agdagsen ti agarup nasurok maysa a gramo bayat a nakumpiskar kenni Estacio ti maysa a pakete ti mapapati a shabu nga agdagsen ti kagudua a gramo.
Aggatad amin dagiti nakumpiskar a mapapati a shabu iti nasurok P78-K.
Kinumpiskar metlaeng dagiti otoridad dagiti cellphone ken lugan nga inaramat dagiti suspek iti panakitransaksionda kadagiti operatiba bayat a narekober ti naaramat a boodle money.
Iti agdama, sumangsango dagiti tallo iti kaso a panaglabsing iti RA 9165 wenno Comprehensive Drug Act of 2002.
