Napateg a maawatan ti life cycle ken dagiti aramid dagiti lamok a maaw-awagan iti Aedes tapno epektibo a maliklikan ti dengue, chikungunya, ken Zika, sigun iti maysa nga entomologist iti Department of Health–Cordillera.
Inlawlawag ni Alexander Baday a ti Aedes aegypti ket dumalan iti uppat a lebel—itlog, larva, pupa, ken adult—ken tunggal lebel ket adda ti kaskenan a wagas iti panagkontrol tapno malapdan ti panagadu dagitoy.
Impaganetgetna nga ad-adda nga epektibo ti panangdadael kadagiti pagtataudan iti lamok ngem iti agdepende laeng iti fogging ken dadduma pay a kemikal.
Karaman ditoy ti maaw-awagan a “4 Ts”: Taob, Tak-tak, Tuyo, ken Takip tapno maliklikan ti panagurnong iti danum a pagit-itlogan dagiti lamok.
Sigun kenni Baday, ti Aedes aegypti ket kadawyan a kumagkagat iti agsapa ken malem, nababa ti panagtayabda, ken mabalin nga agitlog iti agingga iti 400 iti panagbiagda.
Gapu iti daytoy, napateg ti agkadwa a panagtignay iti komunidad tapno mapababa ti populasion iti lamok.
Palpalagipanna metlaeng ti publiko a saan laeng a tunggal panagtudo nga agbalin nga alerto kontra iti dengue gaputa kabaelan nga agbiag dagiti itlog iti lamok iti sumagmamano a bulan uray namagaan ti aglawlaw.
Agtultuloy met nga itantandudo iti DOH dagiti kampania a 4 o’Clock Habit ken ti 4S Strategy kas kangrunaan nga addang kontra kadagiti sakit a tugot iti lamok.
