BAGUIO CITY – Makipatang ti Liga dagiti babbarangay ti siudad ti Baguio iti Department of Education tapno pagsaritaan dagiti addang a maiwayat iti panaglukat ti klase dagiti parapubliko a pagadalan inton Oktubre 5, Lunes.
Iti panakiyuman ti Bombo Radyo kenni ABC President ken Councilor Michael Lawana, dinakamatna nga awan pay ti pormal a koordinasion a napasamak iti nagbaetan ti DepEd ken dagiti babbarangay para iti panakiawaras ti learning modules dagiti estudyante.
Inlawlawagna a nupay adda dagiti immunan a panakipatang ti nasao nga ahensia kadakuada ket awan pay ti napirmaan a katulagan a seknan iti pagrebbengan dagiti opisyales ti babbarangay para iti distance learning dagiti estudyante.
Kinunana a nagresulta daytoy iti panakatikaw dagiti maseknan nga opisyal nangruna ta immunan a nagpirma iti katulagan ti pulisya ken ti ahensia seknan iti partnership dagitoy iti nasao a programa.
Innayon pay ni Councilor Lawana a silulukat latta ti liga dagiti babbarangay a tumulong iti ahensia partikular ti house to house a panakaiwaras dagiti learning modules dagiti estudyante.
