Impaganetget dagiti opisial iti siudad ti Baguio a rumbeng nga ituloy ti ligal ken administrative proceedings seknan iti napasamak a bullying ken panangdangran iti maysa nga estudiante idiay Barangay Pinget, uray naaddaanen iti amicable settlement dagiti pamilia a karaman.
Sigun kenni Mayor Benjamin Magalong, raraemen iti siudad ti pangngeddeng iti pamilia iti biktima a makipag-areglo, ngem rumbeng latta a sungbatan dagiti estudiante a karaman.
Naipadamag nga immanamong ti pamilia dagiti akusado nga agbayad iti P800,000 iti pamilia iti biktima. Nagkiddaw metlaeng iti pammakawan ti tunggal estudiante a karaman.
Agtultuly met ti psychological assessment ken dadduma pay nga intervention iti biktima ken dagiti akusado iti tulong iti DSWD.
Kabayatanna, kidkiddawen ni City Councilor Edison Bilog nga ituloy dagiti kaso iti bullying nu adda ti umdas nga ebidensia iti panaglabsing iti city anti-bullying ordinance.
Sigun kenni Bilog, mabalin nga aramaten kas ebidensia ti CCTV footage, video recordings ken dadduma pay a dokumento uray awan ti testimonia manipod iti biktima.
Inallukoyna ti publiko nga ireport dagiti insidente iti bullying ken makitinnulong kadagiti otoridad tapno malapdan dagiti kapada a kaso.