BAGUIO CITY – Maaw-awis ti suporta ti publiko iti Likhang Hiraya a paset ti sustainable livelihood program ti Department of Social and Welfare – Cordillera idiay Malcolm Square, Baguio City.
Ti nasao nga aktibidad ket addaan ti tema a “Sulong Kabuhayan Tungo sa Pagyabong”.
Karaman kadagiti mailaklako ket dagiti nateng, home made ice cream, hand made crochet wenno handicraft, rabbit ken daduma pay.
Sigun kenni Regional Director Leo Quintilla, paset daytoy ti panangsuportada kadagiti benepesyaryo ti Sustainable livelihood program iti DSWD-CAR.
Kinunana a gundaway daytoy tapno maiparang dagiti nagduduma a produktoda iti merkado publiko.
Innayonna pay a sumagmamano kadagiti beneficiaries ket karaman kadagiti biktima ti uram iti Baguio City Public Market idi napalabas a Marso bayat a ti daduma pay ket regular a benepesyaryo ti nasao a programa a karaman iti Micro, small and medium enterprises (MSMEs) iti siudad.
Dinakamatna met a putiryada ti makikoordinar kadagiti nagduduma a malls a mabalin a pakaiparangan dagiti nagduduma a produkto tapno naan-anay pay a maital-o daytoy.
Kabayatanna, nalaos met ti panagyaman dagiti benepesyaryo gapu ta ad-adda a matulongan ti pagbiagan dagitoy.//Bombo Razced Pagoli
