Nakemmeg ti lima a lalaki babaen dagiti kameng ti National Bureau of Investigation (NBI) gapu iti mapapati nga aktibidad ti panagespia.
Kinuna ti National Bureau of Investigation (NBI) a nakemmeg dagiti lima a suspek idi Pebrero baente kalpasan a naduktalan ti ahensia a dagiti mapagduaduaan a lugan ket mapapati nga agar-aramat kadagiti international mobile subscriber identity (IMSI) catchers ken agturturong kadagiti kampo dagiti militar ken pulis, dadduma pay nga essential systems, pasilidad, ken dadduma pay a sangay ti gobierno iti uneg ti Metro Manila.
Binerepikar ti nasao nga ahensia ti impormasion ken nakumpirmar ti nasao nga aramid.
Immunan a nakemmeg ti tallo a suspek a mapapati metlaeng a mangisaysayangkat ti panagespia.
Kinunada a tinangdanan dagitoy ti maysa a lalaki a Chinese nga agnanaed idiay Malate, Manila.
Kinunada pay a nabilin dagitoy nga agturong kadagiti lugar a kas ti Villamor Airbase, Camp Aguinaldo, Malacañang, Camp Crame, and US Embassy para iti P2,500 agingga 3,000 tunggal bulan.
Kalpasan ti sumagmamano nga aldaw, nakemmeg ti lalaki ken ti maysa pay a suspek.
