BAGUIO CITY – Imbutaktak ti Food and Drug Administration (FDA) – Cordillera a lima a produkto ti pampintas a mailaklako iti rehiyon ti saan pay a nakarehistro iti ahensia idi napalabas a tawen.
Maibasar daytoy iti naawat ti FDA-Cordillera a resulta ti isaysayangakatda a post marketing surveillance wenno ti panagkolektarda kadagiti samples dagiti produkto ken isumitirda daytoy iti FDA – Central Office para iti analyis ken product verifications.
Iti panakiyuman ti Bombo Radyo Baguio kenni FDA-Cordillera Licensing Officer Saturnina Pandosen, kinunana a nakakolektarda iti 14 a produkto a pampapintas iti entero a rehion ken walo kadagitoy ti naisubmitir para iti laboratory analysis.
Dinakamatna a pimmasa iti parameters dagiti walo a produkto babaen iti panakaidalan dagitoy iti umno a proseso.
Nupay kasta, kinunana a manipod kadagiti innem a nabatbati a nakolektarda a produkto ti pampapintas ket maysa laeng kadagitoy ti rehistrado iti FDA.
Gapu iti daytoy, dinakamatna a nasken a mangipaulog ti Center of Cosmetic Products iti advisory kadagiti konsyumer seknan iti saan a panakaidalan iti umno a proseso dagiti nasao a produkto.
Innayonna a nasken metlaeng a mangipaulog ti FDA iti legal order nga iyemplementar ti dadduma pay nga stakeholders ti ahensia mainaig kadagiti nasao a produkto.
Kinunana pay a kangrunaan a saan a nakarehistro a produkto ket dagiti lipstick, eyebrow liner, whitening cream ken dadduma pay.
