BAGUIO CITY – Naidanon ken naiwaras dagiti relief packs kadagiti residente ti Barangay Supo ken Barangay Wayangan, Tubo, Abra iti baet ti saan a nasayaat a sasaaden ti panawen idi Setyembre 4.
Daytoy ket babaen iti panagtinnulong dagiti personnel ti Tubo Municipal Police Station, Local Government Unit ti Tubo, Philippine Amry ken sibilyan.
Nupay napigsa ti ayos ti danum iti karayan ket balligi a naiballasiw ti agarup lima a tonelada ti assorted vegetables, food packs ken assorted clothing nga indonar dagiti estudyante ti Benguet State University, University of Cordilleras ken dagiti kadete manipud iti Philippine Military Academy (PMA).
Naiyawat dagiti nasao a tulong kadagiti residente a naapektaran iti magnitude 7 a gingined ken dagiti naapektaran iti kalamidad sadiay Abra.
