Dumanonen iti lima ti bilang dagiti indibidwal a pimmusay gapu iti Dengue idiay La Trinidad, Benguet.
Iti panakiuman ti Bombo Radyo kenni La Trinidad Mayor Romeo Salda, dagiti tallo nga immuna a pimmusay ket pakairamanan dagiti indibidwal nga agtawen iti pito pulo ket tallo (73), limapulo ket tallo (53), ken dua pulo ket innem (26), bin-ig a residente ti La Trinidad, bayat a maberipikar paylaeng nu dagiti kanayonan a dua a pimmusay ket residente metlaeng iti nasao a munisipyo.
Sigun kenni Mayor Salda, pakabuklan a 1,431 a kaso ti dengue ti nailista iti nasao a lugar agingga ita nga aldaw, 725 kadagitoy ket lallaki, bayat a 706 met dagiti babbai.
Daytoy ket agarup 156% a nangatngato nu idilig iti nairekord idi napalabas a tawen.
Haan mi nga i-declare pay(state of calamity) ta kitaen tayo. ngem daytoy nga adda ti additional nga dua nga death, makita nu anya ti desisyon dagiti doctors.
Manipod iti pakabuklan a bilang, kaadwan a nailista ket residente iti Pico a dumanon iti 257, simmaruno ti Balili nga addaan iti 250, Tawang a 165, Puguis a 152, Poblacion a 126, Betag nga 86, Lubas a 76, ken nasurok sag-sisingkwenta met ti nailista dagiti daduma pay a babarangay.
Sigun pay iti Mayor, kaadwan kadagiti pasyente ket agtawen iti nagbaetan ti onse (11) ken trenta(30).//Bombo Rob Dominguez
