BAGUIO CITY–Naireklamo iti City Permits and Licensing Office ti agarup 50 a business establishments ditoy siudad gapu iti kinaawan ti kaskenan a permiso dagitoy.
Sigun ken ni licensing officer Allan Abayao, dagiti nasao nga establisiemento ket inreklamo dagiti kaarubada ken kadawyan kadagitoy ket auto-shops ken dagiti babassit a negosio.
Kinunana a naipaayan iti lima nga aldaw a pawayway dagiti agtagikua kadagitoy a negosiante tapno mangalada iti permiso.
Kinunana a no mapaay dagitoy a mangala iti permiso ket ibilin ti City Permits and Licensing Office ti pannakairikep dagitoy.
Kabayatanna, impakaammo ni Abayao a kadagiti masungad nga aldaw ket mangipatungpalda iti regular nga inspeksion kadagiti business establishments ditoy siudad.
Mainaig iti daytoy ket al-allukuyenna manen dagiti negosiante a mangala dagitoy iti business permits tapno agnumar dagitoy iti maididiaya a 25 porsiento a diskwento agingga inton Marso.
