BAGUIO CITY–Posible a dumanon laeng iti 120 a bisita ti mapalubusan a dumar-ay para iti tinawen a Philippine Military Academy Alumni Homecoming ditoy Baguio City.
Maibasar iti inisyal a report ti akademya, manamnama a maipatungpal ti homecoming inton Pebrero 12 agingga Pebrero 14, 2021.
Iti interview ti Bombo Radyo Baguio kenni Baguio City Mayor Benjamin Magalong a maysa metlaeng kadagiti alumni ti PMA, kinunana a personal a kiniddawna iti PMA ti pannakalimitar ti bilang dagiti makidar-ay iti nasao nga event.
Imbinsana a dumanon iti 4,000 agingga 5,000 nga alumni, pakairamanan dagiti bisita, ti kadawyan a sumangsangbay ditoy siudad tapno makipaset iti alumni homecoming.
Nupay kasta, gapu iti agdama a pandemya ken tapnu maobserbaran nga umno dagiti health protocols kontra iti COVID19 ket kasapulan a makontrol ti bilang dagiti makidar-ay iti daytoy.
Dinakamatna nga immunan a kiniddawna a malimitaran laeng agingga 300 dagiti mapalubusan a makidar-ay iti daytoy ngem idi laeng nabiit ket bimmaba daytoy agingga 120.
Kinunana manageable ti nasao a bilang tapnu maipasigurado ti physical distancing kadagiti aktibidad iti nasao nga aldaw.
Kabayatanna, temporaryo a mailukat ti Kennon Road intun Pebrero 12 agingga 14 kalpasan nga inaprubaran ti Regional Disaster Risk Reduction and Management ken Civil Defense Cordillera ti kiddaw ti PMA para kadagiti makidar-ay iti homecoming.
Nailanad iti maysa a memorandum a mailukat ti one way a paturong ditoy siudad a paset ti Kennon road manipod alas sais ti agsapa intun Pebrero 12 agingga iti 12 tenggat rabii ti Pebrero 13 bayat nga one way pabada iti 12 MN intun Pebrero 14.
Nalimitaran iti 5 a tonelada a kadagsen ti lugan laeng ti mapalubosan a dumalyasat iti Kennon Road iti naituding nga aldaw.
