BAGUIO CITY -Imbilin ti mayor ti Baguio ti panangisayangkat dagiti amin a barangay iti linawas a clean-up drive iti masakupan dagitoy tapnu madalusan ken maikkat dagiti mabalin a pagpaaduan dagiti lamok, pakairamanan dagiti lamok a nakaimet iti dengue virus kas maitunos iti Anti-Dengue Ordinance ti siudad.
Nailanad iti Executive Order No. 94 ni Mayor Benjamin Magalong ti dagus a panangbiag dagiti kapitan dagiti 128 a barangay ti siudad iti Barangay Anti-Dengue Brigade dagitoy para iti nasao a ranta.
Nailanad iti direktiba ti panangibilin, panangisuro ken panangasistar dagiti barangay officials kadagiti babbalay ken establishimento iti masakupan dagitoy iti innaldaw a panagbiruk ken panagdadaelda kadagiti mabalin a pag-itlogan dagiti lamok.
Maibasaar iti report ni City Epidemiology and Surveillance Unit ti City Health Services Office, pakabuklan a 671 ti kaso ti dengue infection iti Baguio manipud Enero 1 agingga Agosto 6 iti agdama a tawen a nakatayan ti pito nga indibidual.
Dumanon metten iti agarup 32 a barangay ti nakailistaan ti clustering wenno grupo dagiti kaso ti dengue fever manipud idi napalabas a Hulyo agingga Agosto.
Ikalkalikagum ti Anti-Dengue Ordinance of Baguio ti umno a panangkalob kadagiti amin a mabalin a pakaurnongan ti danum gaputa dakkel ti posibilidad a pag-itlogan dagitoy dagiti lamok malaksid pay iti umno a panangibelleng kadagiti basura.
Immuna metten a naiballag nga iti panagtutudo ket kadawyan nga umad-ado dagiti pagitlogan daigti lamok isut gapuna a kasapulan ti panakikaykaysa ti publiko tapnu maipatungpal dagiti umno nga addang kontra iti dengue infection.
