BAGUIO CITY – Nakuryente ti maysa a lineman kalpasan nga inatalan ti maysa a truck ti internet connection wire nga itartarimaanna sadiay Tam-awan Village, Pinsao Proper, Baguio City idi kalman.
Nabigbig daytoy a ni Ryan Christopher Belingon, 24-anyos ken residente ti Sampaguita Street, San Luis, Baguio City.
Nabigbig met ti driver ti truck a ni Miller Lucio, 36-anyos ken residente ti Wandayan, Puguis, La Trinidad, Benguet.
Maibasar iti report, narikna ti nasao a lineman ti panag-ground ti kable nga itartarimaanna.
Nupay kasta, idi bimmaba daytoy manipud iti nagpwestoanna ket apag-isu met nga aksidente a naatalan ti truck ti nasao a kable a nangitunda iti panakakuryentena.
Naamuan a nagtaud ti truck sadiay Tacay Road ken paturong kuma sadiay Tam-awan Village idi napasamak ti nasao nga insidente.
Dagos a naitaray ti biktima iti pagagasan ken iti agdama ket addan iti natalged a kasasaad.
Nakumpisar met ti lisensiya ti driver ti truck para iti dokumentasyon. (-with Bombo Brigitte Marcasi)
