Kayat ni DILG Secretary Jonvic Remulla a maamyendaran dagiti linteg iti panagtagikua iti paltog tapno pabasulen metlaeng iti kaso a kriminal dagiti lisensiado a gun owner nu dagiti paltogda ket aramaten iti dadduma nga indibidual iti krimen.
Nagramut ti isyu kalpasan ti pammaltog iti San Jose National High School idiay Tacloban City.
Kinunana nga adda ti “gap” iti agdama a linteg gaputa saan a dagos a mapabasol ti agtagikua iti paltog nu daytoy ket inaramat iti dadduma iti panangaramid iti krimen.
Panggepna nga isingasing iti Kongreso ti panagrebisar kadagiti pagalagadan iti gun ownership tapno mairaman ti criminal liability dagiti agtagikua a saanda nga inalwadan dagiti armasda.
Impaganetgetna a rumbeng a naka-lock ken natalged dagiti paltog, ken ti responsibilidad daytoy ket kanayon nga adda iti gun owner.
Kidkiddawenna metlaeng a repasuen ti Juvenile Justice and Welfare Act, gapu kadagiti nakitana a kaso iti agtutubo a karaman iti krimen ken ti maipapan ti responsibilidad.
