Inwaragawag ti Commission on Elections (Comelec) nga agsuratda iti Department of Public Works and Highways (DPWH) tapno maammuan no dagiti kontraktor a timmulong iti kampania dagiti kandidato iti 2022 elections ket addaanda ti kontratada iti gobierno.
Sigun kenni Comelec chairman George Garcia, makiddaw nga agpammalawag dagiti maduktalan a kontraktor.
Impeksa ti nasao nga opisial nga iti kanito maalada ti listaan, maipatulod ti surat kadagiti kompanya.
Inyunay-unay ni Garcia a sukimatenda amin dagiti kontrator, iti national man wenno local.
Immuna a kinuna ni Garcia a maiparit dagiti Government Contractor a mangipaay iti suporta iti aniaman nga elective candidate agsipudta, maysa daytoy nga Election offense nga addaan iti dusa a maysa agingga iti innem a tawen a pannakaibalud.
Mabalin pay nga agresulta iti pannakakanselar dagiti lisensia wenno permit dagiti kompania ti kontraktor.
