BAGUIO CITY–nabaliwanen dagiti loading areas ken staging areas dagiti parapubliko a jeep nga addaan ruta iti plaza wenno iti sentro ti siudad ti Baguio.
Paset daytoy ti kampanya ti lokal a gobyerno a panakakissay ti kinailet ti trapiko ken iti panakakissay ti polusyon iti sentro ti siudad.
Nailanad iti Executive Order No. 114, series of 2020 nga impaulog ni Mayor Benjamin Magalong nga agserbi a loading area ti Governor Pack Road bayat nga agserbi nga staging area ti Sandico Street para kadagiti ruta iti Baguio Plaza nga agturong iti Mines View, Navy Base, Tiptop, Pacdal Liteng, Lucnab, Maria Basa, Happy Hallow via Country Club ken via Kadaclan ken ti Camp 7.
Agserbi met a loading area ti Claudio Street bayat nga agserbi nga staging area ti Calderon Street para kadagiti ruta ti Baguio Plaza nga agturong iti San Vicente,Poliwes ken Camp 8.
Agserbi kas loading area ken staging area ti Claudio Street para iti ruta a Baguio Plaza-Loakan bayat nga agserbi kas loading area ken staging area ti Otek Street para iti ruta a Baguio Plaza-Kitma.
Agserbi pay kas loading area ken staging area ti Diego Silang para iti ruta a Baguio Plaza-Diego Silang ken ti ruta iti BAL PNR Circle Hillside.
Nailanad metlaeng a ti pammilin ket bunga ti agtultuloy a panagadal ti Land Traffic and Transportation Management Committee babaen iti Baguio Traffic and Transportation Technical Working Group tapnu mapasayaat ti gunay ti trapiko ditoy siudad ti Baguio.
