![](https://img.bomboradyo.com/baguio/2021/08/covid-update.jpg)
BAGUIO CITY – Dumanon ita iti 12 ti local cases ti Delta variant ti COVID-19 iti entero a Rehion Cordillera.
Maibasar iti listaan ti DOH-CAR, tallo itan ti local cases ti Delta variant sadiay Apayao, lima iti Baguio City ken uppat iti Benguet.
Nailista met ti panagpositibo iti Delta variant ti tallo a Returning Overseas Filipinos (ROF) iti rehion a bukbuklen ti dua sadiay Abra ken maysa iti Baguio City, no sadino, nairaman dagitoy a kaso iti database ti ROF.
Ipalpalagip pay ti DOH-CAR ti nainget a panangsurot dagiti umili kadagiti health and safety protocols tapnu maliklikan ti ad-adda a panagwaras ti sakit ken ti panagpabakuna dagitoy kontra iti COVID-19.
Kabayatanna, sadiay probinsia ti Benguet, dua kadagiti kaso ti Delta variant ket nailista sadiay La Trinidad bayat a saggaysa ti nailista ti Buguias ken Tuba.
Maibasar iti impormasyon, ti Delta case sadiay Buguias ket 34-anyos bayat a ti maysa kadagiti Delta case sadiay La Trinidad ket 32-anyos a lalaki ken agpada dagitoy nga agpapaimbag paylaeng.
Nupay kasta, pimmusay idi August 12, 2021 ti maikadua a Delta case ti La Trinidad a 56-anyos a na-admit iti pagagasan idi August 7, 2021.
Naimbagan metten ti Delta case sadiay Tuba.
Manarimaan metten ti contact tracing kadagiti nakapulpulapol dagiti nasao nga indibidual.
Kabayatanna, naobserbaran ti Benguet Provincial Health Office ti panagdoble ti kaso ti COVID-19 iti probinsia, no sadino, ti bed capacity ita dagiti ospital iti Benguet ket 85%.
Ituloy met ti pulista a mangimanmando kadagiti border checkpoints ti nainget a panangimplementarda iti “no negative RT-PCR test or proof of being fully-vaccinated, no entry” policy para kadagiti non-Benguet residents.