BAGUIO CITY – Inaprobaranen ti Land Transportation Franchising Regulatory Board (LTFRB) – Cordillera ti Local Public Transport Route Plan (LPTRP) ti siudad ti Baguio.
Nabukel ti LPTRP kas paset ti modernisasyon ti parapubliko a transportasyon iti siudad.
Iti panakiuman ti Bombo Radyo Baguio kenni Councilor Benny Bomogao, dadaulo ti Committee on Public Utilities, Transportation and Traffic Legislation iti lokal a konseho ti siudad, dinakamatna a nabukel ti LPTRP tapnu maorganisa dagiti ruta dagiti parapasahero a lugan partikular dagiti jeep ditoy syudad.
Kinunana nga adu dagiti jeep nga agdaldalyasat ditoy syudad ken addaan dagitoy ti nagduduma a ruta.
Innayonna a makatulong ti nabukel a plano tapnu mapalukayan ti mapagparparikutan a nailet a trapiko ditoy syudad.
Dinakamat ti konsehal a babaen iti nasao a plano ket maaddaan dagiti jeepney operators iti kooperatiba tapnu maimaymaysa ti mangsakop kadagiti nagduduma a ruta.
