BAGUIO CITY – Kaaduan iti kaso ti COVID-19 ditoy siudad ti Baguio ket gapu iti local transmission.
Inwaragawag daytoy ni City Health Services Officer Dr. Rowena Galpo kas maibasar iti datus ti opisinada ken ti Contact Tracing Team ti Baguio.
Maibasar iti datus, manipud iti 253 a kaso ti COVID-19 ti siudad a nailista idi Lunes, August 17 ket 84% kadagitoy ti awanan ti travel history.
Naamuan a dagitoy ket driver dagiti parapubliko a lugan, empleyado kadagiti bangko ken grocery stores, vendors ken dadduma pay a nakapulapol dagiti adu nga indibidual.
Naduktalan iti datus a 16% laeng kadagiti kaso ti COVID-19 iti siudad ti addaan ti travel history ken dagitoy ket bin-ig a residente ti Baguio.
Naamuan pay a 90% kadagiti pakabuklan a kaso idi Lunes ti asymptomatic wenno awanan ti sintomas ken dagiti makapaspasar ti mild symptoms bayat a 10% ti makapaspasar iti moderate agingga severe symptoms.
Gapu iti daytoy, iyap-apela manen ti otoridad ti panagtungpal ti publiko kadagiti maipatpatungpal a health protocols kas iti kanayon a panagsuot ti face mask ken face shield, panagobserbar iti physical distancing ken ti saan a panagruar no awan met ti napateg nga aramiden iti ruar ti balay.
