BAGUIO CITY – Mapattapatta nga agarup uppat a ribo a maladaga iti rehion Cordillera ti maibilang a lockdown babies.
Iti panakiyuman ti Bombo Radyo Baguio kenni Commission on Population (POPCOM) – Cordillera regional director Magdalena Abellera, kinunana a daytoy ket naibasar iti panagadal ti Philippine Statistics Authority ken ti UP Population Institute.
Sigun kenkuana, dagiti lockdown babies iti Cordillera ket 2% ti agarup 214,000 a maladaga a mapattapatta a maipasngay inton sumaruno a tawen a resulta ti saan a naplano a panagsikog gapu iti manarimaan a community quarantine gapu iti COVID-19 pandemic.
Kinunana a naobserbaran kadagiti health centers ti panagngato iti pregnancy check-ups idi naipasidong ti rehiyon iti community quarantine.
Amkenna metlaeng a no agtultuloy ti community quarantine ken ti kaawan ti access dagiti pamilya kadagiti family planning services ket umado pay dagiti babbai nga agsikog.
Gapu iti daytoy, dinakamat ni Abellera nga addan dagiti population officers ti POPCOM-Cordillera, dagiti barangay health workers ken dagiti barangay population volunteers nga agturturong a mismo kadagiti babbalay ditoy rehion.
Dinakamatna a mangipapaay dagitoy kadagiti family planning services ken iti impormasyon iti panagkontrol nangruna ta limitado ti garaw dagiti tattao ita a community quarantine.
Innayonna nga inlukatda metten ti health-line ti POPCOM-Cordillera a 0927-076-0881; 0929-824-6592 ken 074-444-5212 a mabakin a kontaken dagiti babbai para iti kasapulanda nga impormasyon wenno no agkiddawda kadagiti family planning services kas iti pills wenno contraceptives.
