Guyguyuguyen ti local a gobierno ti Baguio City ti publiko a planoen dagitoy a nasayaat ti panagpamilya nangruna nu dagitoy ket maaddaan iti anak.
Impeksa ni Baguio City Mayor Benjamin Magalong, a dakkel nga stress nu saan a naplano a maaddaan iti anak.
Patienna a daytoy ket maysa a mental isyu nga agbalbalin a karit kadagiti agpartner wenno agassawa nangruna nu awan ti maiyannatop a suporta a maipaay kenkuada manipud kadagiti maseknan nga ahensya.
Sigun kenkuana, nakasagana ti lokal a gobierno a mangipaay iti tulong ken suporta kadagiti addaan problema mainaig iti panagsikog.
Maipalagip nga idi napalabas a lawas, nabirukan ti maysa a fetus iti pagbasuraan iti siudad ti Baguio.
Mabirbirok paylaeng ti nagannak daytoy para iti nasken nga intervention ken umno nga aksiyon.
Kabayatanna, nagpalagip manen ni Mayor Magalong kadagiti ag-partner ken naasawaan a planuen a nasayaat sakbay nga agsikog tapno nasayaat a maisagana dagiti kasapulan dagiti agbalin nga annak dagitoy.
Impeksana a masapul a maawatan dagiti nagannak ti responsibilidad a maibagbaga iti panangtaripato, panangpadakkel ken panangsuporta iti anak.
Nagpalagip met daytoy iti publiko a saan a rumbeng a baybay-an dagiti maladaga uray no adda dagiti personal a parikut a mapaspasaran dagitoy.
Mainaig iti dayta, impanamnama ti lokal a gobierno a nakasagana dagiti maseknan nga opisina a mangipaay iti counseling, suporta ken dadduma pay a tulong kadagiti agkasapulan.
Innayonna a nasaysayaat a dumawat iti tulong kadagiti ahensya ti gobierno imbes a mangaramid iti anyaman a pamay-an a mabalin a mangitunda ti peligro iti biag ken salun-at ti ubing.//Bombo Khey Reparip
