Inyebkas ti lokal a gobyerno ti Atok, Benguet ti pannakipagladingitda iti pamilya ken gagayem ni Mr. Rogelio Sawey, ti senior citizen a mapukpukaw sipud pay Agosto, kalpasan a nasarakan ti bangkay daytoy.
Maipalagip a nagtultuloy ti search operation para kenni Mr. Sawey sipud idi napukaw daytoy.
Sigun iti pablaak ti Atok Municipal Disaster Risk Reduction and Management (Atok MDRRMO), nasarakan ti bangkay ni Sawey babaen iti maysa a residente ti Salidet, Botiao, Cattubo, Atok, Benguet.
Dagosna met nga impakaamo daytoy kadagiti maseknan a pamilya sakbay a naipakaamo kadagiti otoridad.
Dagos met a nagturong iti nasao a lugar dagiti kameng ti Atok Municipal Police Station, Atok Fire Station, MDRRMO, kasta metten dagiti Barangay Officials, Health workers, kabagyan ken volunteers, para iti retrieval.
Sigun pay iti nasao nga opisina, naitransport metten ti bangkay ti senior citizen iti lugar na idiay Capinitan, Sabangan, Mt. Province kas desisyon dagiti maseknan a pamilya.
Inyebkas met ti Munisipyo ti Atok nga idadaulon ni Mayor Franklin L. Smith ti pannakipagriknana kadagiti pamilya a napanawan.
Kagidan dayta, pinagyamanana metlaeng ti pannakitinnulong dagiti maseknan nga ahensya, pamilya, komunidad, ken volunteers agingga iti pannakasarak ni Sawey.
